Бокс боюнча жаштар курамасынын ага машыктыруучусу отставкага кетти
Кыргызстандын бокс боюнча жаштар курама командасынын ага машыктыруучусу Абдыганы Өмүрзак уулу отставкага кетип атканын "ВБ"га билдирди.
Анын айтымында, кызматтан кетүүгө негизги себеп 25-30-ноябрда Ереванда (Армения) өткөн дүйнөлүк чемпионатта курама команда ийгилик жарата албаганына байланыштуу болду. "Бул чемпионатта биз медаль ута алганыбыз жок. Мен өз ыктыярым менен жумуштан кетүүнү сурандым", - дейт машыктыруучу.
Ал ошондой эле кечээ жакында ага машыктыруучу менен башкы машыктыруучулардын чогулушу болгонун айтып, анда 2009-жылдан бери жасалган иштер тууралуу отчет бергенин кошумчалады. "Отчет берген соң кызмат ордумду тапшырып бердим. Эми мен Ошто бокс боюнча негизги ишимди аркалайм", - дейт ал.
Эскертсек, Абдыганы Өмүрзак уулу Кыргызстандын жаштар курама командасынын ага машыктыруучусу болуп 2009-жылы дайындалган. Анын тарбиялануучулары 2010-жылы Азия жана дүйнөлүк чемпионатта эки коло медаль жеңип келишкен. Андан сырткары 2010-жылы Ислам Далибаев Жаштардын I олимпиадалык оюндарына жолдомо утуп алган.
